「日本」
其實我係第一次去九州，之前幾次都去日本都係同老婆去。而上次去完東京之後，我同老婆講我嘛嘛哋因為我都係鍾意去啲有景嘅地方。所以今次去九州，老婆就搵咗啲靚景嘅地方等我影過飽。當然有時係香港真係好悶，日日如是，而我老婆基本上而家都係照顧郭大少，所以真係要抖抖氣。今日一到步就咋咋臨去攞車，開始我哋嘅九州之旅。沿途風景真係好靚，而有時去旅行就係要睇下其他地方嘅風土人情，唔係下下都係去血拼嘅。
「九州」
今日同一家大細趁著年尾再出走多一次，而今次嘅目的地係去日本九州。當然事前最辛苦嘅就係我老婆啦，因為佢度好晒啲行程，而最勁嘅就係佢訂都超平嘅機票。今次亦都係我哋帶住郭大少去嘅第三次旅行，但係挑戰亦都比上兩次大，因為佢而家真係走唔停，唔似得第一次咁仲未識得行嚟行去。不過今次佢應該會興奮啲，因為而家識嘅嘢多咗。而我哋兩公婆就同之前一樣只係換咗個地方湊仔。
「行程」
一如以往，郭大少依然係最興奮嗰個。佢每次搭飛機都超興奮，好彩佢都係飛機上面瞓咗一個鐘頭左右，等我哋搞少佢一陣。雖然今日中午兩點先至出發，但係就去即刻揸去咗食炸豬扒，事關我哋大家都未食嘢，好肚餓！之後去咗霧島山坐火車同纜車去睇咗陣風景，然後就係上面瀡返落山。然後去酒店之前順道去咗霧島神宮一陣就離開前往宮崎縣。去到酒店之後都已經係晚飯時間，所以放低啲嘢就去食咗個宮崎名物炭烤地雞。不過真係雞，全部都係雞，全部都係雞，全部都係雞～～食完晚餐就去咗中央通食咗個好好味嘅甜品先至再返酒店休息。聽日再同大家繼續講我哋嘅九州之旅！
Also published on Medium.
