「營商」
過去兩年都有幫學生營商體驗計劃做商界顧問，而今年就選擇咗去幫嘉諾撒聖心書院嘅學生。當然好開心見到啲中學生參加嚟個活動，因為除咗要應付日常學校嘅嘢之外，佢哋仲要係好短嘅時間之內諗一個產品兼且要製造出嚟。當然個計劃唔係啲乜嘢比賽，而係希望啲中學生可以透過活動去理解營商嘅環境，所以就算到最後無如何既獎項都唔緊要，因為只係希望佢哋了解營商究竟係啲乜嘢回事。我哋嘅責任只係在旁協助，給予意見！
「體驗」
好開心今年自己嘅學生營商體驗計劃團隊係好多唔同嘅問題出現之下，最終可以將佢哋嘅產品製造出嚟！昨日終於將佢哋設計嘅人生管理遊戲拎咗去展銷會同其他有份參與嘅學校一齊去買。其實感覺有少少似年宵啲攤檔，乜嘢產品都有。雖然有事在身，但係都抽咗少少時間去現場支持佢哋。雖然到最後我知道佢哋有少少失望，因為辛苦咗咁耐，但係銷售就未如理想。不過嚟個就係個過程，我相信佢哋經過今次嘅活動會學到好多嘢。
「計劃」
營商就係咁，一定有起跌，而一班中學生係毫無經驗下去營運一間公司其實真係好有挑戰性。由開頭搵供應商去做個遊戲，到設計出現問題，甚至乎係展銷會前一日先至收到用嚟佈置攤位嘅材料，等等。講真佢哋真係超額完成，失落就在所難免，但係今次嘅經驗就好寶貴。不論係學生佢地，其實我都有唔同嘅體驗。至少我會更加了解而家嘅年輕人，從中學習點樣同佢哋溝通。希望之後可以繼續參與嚟個活動啦！
Also published on Medium.
