「選委」
選委會選舉終於塵埃落定，而非建制派獲得超過三百席，依家就真係睇下邊個會走出嚟選特首。到時希望大家所投嘅三百多席可以影響大局！由選票結果，好多都係大比數勝出，好明顯好多香港人都希望有所改變。不過都係個句，一日未知有邊個出嚟參選，一日都好難講，就算知道邊個參選，到最後邊個係香港嘅第四位特首仍然係未知之數。不過好肯定嘅就係大家都希望可以係可選擇嘅人選中揀個比較好啲嘅做特首，如果唔係大家又唔知要等幾多年先至可以再選過。
「特首」
嚟幾日真係講政治嘅嘢講得多咗，但係如果嚟刻問你，你會希望邊個做香港嘅特首？胡國興？葉劉淑儀？林鄭月娥？曾俊華？雖然四個入面得一個已經宣佈參選，但係今日曾俊華已經辭職相信佢應該好快會宣佈參選。至於葉劉淑儀據聞應該今個星期會宣佈參選，不過就仲未知林鄭月娥考慮成點。除咗以上四個人之外唔知仲有無第五個，第六個或更多？有無可能係曾鈺成？我諗大家都真係要等到最後一刻先至會知道有幾多個參選人入到閘。
「財爺」
雖然今日財爺無講明會參選因為佢今日仍然係財爺，但係都幾肯定佢係因為會參選所以先至辭職。當然依家民望最高嘅係佢，但係佢係唔係中國政府想要嗰位就好難講。雖然感覺有少少似當年民望高企嘅曾蔭權，不過有版你睇，大家都覺得佢做特首會好嘅時候，反過嚟又係一個唔稱職嘅特首。如果到最後曾俊華真係成為我哋下一任特首，希望佢可以繼續保持現狀唔好因為成為特首就變成另一個人。
Also published on Medium.
