「圓周」
如果一提到圓周率我相信大部份嘅人都會諗到嘅就係用嚟計算圓形嘅周長，而大部份嘅時間大家只會用圓周率後兩個小數位，即係三點一四。當然圓周率係一個無盡頭嘅數字，而相信除咗科學家之外，應該唔會有人用得著，所以正常嚟講大家都淨係會記得三點一四。講真除咗讀書嘅時候會學圓周率之外，其實係日常生活我相信大家會真係用唔著圓周率。
「樂譜」
如果將圓周率變成一個樂譜，究竟會變成點？美國有一位音樂家將圓周率嘅數值編寫成一首鋼琴曲譜。佢以A小調為主調，然後將零至九嚟十個數字分別對應係十個鋼琴鍵上面。右手彈奏係根據圓周率數值所排出嘅數字，而左手則以和弦搭配。當然如果要彈完了圓周率真係會彈到天荒地老，所以嗰位音樂家目前只係將佢編成咗一首約兩分鐘嘅琴譜。
「無窮」
其實原來將圓周率變成樂譜再彈返出嚟係有一個意想不到嘅效果。或者人生同圓周率一樣，人係有無窮無盡嘅可能性，只不過我哋有無空間去諗一啲好似不切實際嘅嘢。其實好多新嘅事物係咁樣創造出嚟，如果唔係我哋今日嘅生活應該係好唔同。大家不妨搵一日試吓脫離現實社會，做一啲自己平時唔會做嘅嘢，或者你會有另一番嘅體驗。
Also published on Medium.
