「朋友」
雖然唔係每個人都會幫人打過工，但係如果你有嘅話，你會覺得係乜嘢係最寶貴？當然我係指金錢以外嘅嘢啦，因為好多人都會認為係工作所認識嘅朋友都會只係因為工作嘅關係。當你離開間公司嘅時候，好多時就算之前大家係好好嘅朋友都好，但係追逐時間慢慢過去，嗰份友誼唔知點解就會慢慢消失。好多人都會話因為大家嘅工作環境唔同咗，話題亦少咗，事關以前大部份嘅時間都係講公司嘅大小事務。不過其實間唔中亦都會有一兩個人係會保持聯絡，而之間嘅友誼亦都唔單止係建基於大家嘅工作。
「珍貴」
其實出咗嚟做嘢咁多年，當然無乜嘢係未見過。好多時大家會因為工作而成為朋友，而對我嚟講最珍貴嘅就係同你離開咗嗰間公司之後，嗰段關係仍然可以得以保存。我自己覺得係好難得，而慶幸到今時今日仍然可以保存到好多友誼，尤其係以前教過我好多嘢同提攜我嘅老闆們。因為我離開咗間公司都好多年，但係佢哋仍然記得我同保持聯絡。嚟種關係真係好珍貴，因為真係好難得，事關大家嘅工作環境同生活環境都唔同，不過佢哋仍然關心我嘅近況。所以話有時好嘅老闆真係好難搵！
「延續」
係工作上認識嘅朋友都係得來不易，所以有時要更加珍惜嚟啲友誼。雖然未必好似嗰啲同你一齊成長嘅朋友咁完全了解你，但係佢哋嘅角色好唔同，因為佢哋嘅人生履歷好多時都多過你，當你係人生遇到唔同嘅問題嘅時候，佢哋永遠都可以俾到唔同嘅意見你。尤其係以前嘅老闆，因為佢哋好清楚自己嘅工作能力，所以我一直都同佢哋保持聯絡，因為有啲問題淨係得佢哋可以俾到意見。所以我打工嘅得著唔單止經驗咁簡單，而係大家係工作建立嘅友誼得以延續到工作以外！
Also published on Medium.
