「父母」
每個父母都想望子成龍，尤其係中國人嘅社會。我從來都無否定過讀書嘅緊要性，雖然自己唔係讀書嘅材料。自問都係高中啲成績先至好返啲，不過最終都係讀咗一年大學之後就無再繼續，直至前幾年先至有個大學學位。我諗如果我係香港讀書嘅話，我相信我亦都係嗰啲一敗塗地嘅學生。當然每個人都有唔同嘅性格同出路，而我亦相信「近朱者赤，近墨者黑」，所以有時唔係淨係希望自己個仔讀間好學校咁簡單，而係佢身邊嘅朋友同環境係更加重要！
「學校」
係唔係一定名校就係好學校，當然名校都有分好多種。我梗係唔希望郭大少係一隻填鴨，亦都睇到香港教育制度下培育出嘅下一代嘅問題。所以我比較著重品德，而身邊嘅朋友好取決於佢嘅成長環境。小朋友大部份嘅時間都係學校入面，所以要揀一間好學校係幾緊要。其他嘢我相信可以自己係校外去教育佢。不過到最後都要睇佢自己，就算我哋盡量俾最好嘅嘢佢，或者以為幫佢做咗個我決定，但係到頭來都係要睇下佢夾唔夾間學校。不過揀學校都真係唔係一件易事！真係辛苦晒老婆！
「教育」
教育嘅意義係希望將知識一代傳一代，而讀書叻係唔係就代表一切？其實現今社會因為條件越來越好，好多人都會讀到大學畢業，所以依家大學畢業好似已經變成一個年輕人最基本嘅要求。雖然自己嘅路有少少唔同，亦都覺得自己算係比較幸運，因為最起碼當初有公司肯俾機會我嚟個讀書唔成嘅人。不過無論係點，自己已經係人哋嘅爸爸，所以觀點又會有少少唔同。當然我都係個啲望子成龍嘅人，不過有一條底線無論點我都希望堅守嘅就係郭大少一定要開心。
Also published on Medium.
