「遊戲」
我都有今日啦，不過為咗個仔好其實真係無辦法啦，香港嘅教育制度真係無得頂。終於見識到啲幼稚園係點樣面試一個一歲多啲啲嘅小朋友。當然每間學校都有唔同嘅收生標準，自己嘅教育理念，唔同嘅特色。我自己最緊要就係教育環境，因為始終小朋友佢哋無得揀，都係父母去幫佢哋決定去邊間學校。而每個父母都得一個願望就係入到一間好同適合佢哋嘅學校啦。不過嚟個遊戲真係啱啱先至開始。
「面試」
郭大少終於開始要去學前班面試，而過去嗰幾個月佢真係學識咗好多嘢，就算有啲嘢無教過佢，佢都唔知點解無啦啦會識。而我哋最有信心嘅當然係佢嗰個樂天同開朗嘅性格。只不過佢真係坐唔定，而且專注力非常低，如果要佢坐定定幾分鐘真係難過登天。所以如果間學校係以嚟兩樣嘢做收生標準嘅話，我相信都應該無乜機會被取錄。不過郭大少面試嘅表現真係間間都好唔同，或者佢係話俾我哋知佢鍾唔鍾意？
「評分」
老婆當然好緊張郭大少入學嘅事務，而同佢哋去咗幾間幼稚園之後，我都真係唔知啲幼稚園係點樣評分。一日見咁多小朋友，每個人嘅評分標準又唔同，感覺好似考車咁，睇下嗰日係邊個考官。而佢哋面試同我哋去見工真係無乜分別，因為都真係頭十幾分鐘就定生死。自己都教書，當然每個老師都希望有乖同勤力嘅學生，但係教育嘅本質就應該係有教無類，所以希望搵到一間合心意嘅學校啦。
Also published on Medium.
