「社會」
當然傳統嘅社會就係男主外，女主內。一個家庭通常都係爸爸搵錢，媽媽照顧家庭。不過我亦都認識幾位朋友係正正相反，而好多爸爸都會講一句就係為咗屋企無辦法啦，要擔起頭家嘛！當然嚟個或者係爸爸嘅天職，雖然唔係所有爸爸都係咁，不過我相信好多爸爸亦都希望多啲時間去陪自己嘅仔女，如果有得揀也許爸爸都或者希望自己係照顧小朋友嗰個。只不過大部份時間嚟個可能性係極低！
「爸爸」
其實自從有咗郭大少之後，自己會留意多咗有關小朋友嘅嘢，但係發現好多時不論文章又好，廣告又好，都係從媽媽嘅角度入手。但係大家係唔係忽略咗爸爸嚟個角色呢？老實講爸爸亦都要面對好多問題同情況，但係好似好少人去關心佢哋。爸爸們其實都好想多啲時間陪小朋友，佢哋亦都關心同擔心自己嘅小朋友。雖然好多時啲文章都會講父母，只不過大部份時間都係講媽媽為主，咁爸爸們呢？
「角度」
如果有機會去拍一條片或者係廣告嘅話，我相信我嘅故事大綱係會以爸爸嘅角度出發。當然之前都有，但係都係因為父親節嘅原因。好多嘢其實不論係爸爸或者媽媽都係一樣，為咗自己嘅小朋友點都會頂硬上！點解？因為爸爸同媽媽嘅願望都係好簡單，就係希望俾最好嘅嘢佢哋，等佢哋有更好嘅嘢。所以或者有時唔一定從媽媽嘅觀點與角度出發，因為有時或者從爸爸嘅角度出發效果有可能仲好。至少我係咁樣諗！
