「人工」
最近睇咗幾篇文章都提及好幾個工種都會被人工智能取代。其實乜嘢係人工智能？人工智能簡單嚟講就係利用電腦去模仿人類嘅大腦。當然電腦可以處理嘅嘢係比人腦多，而且電腦係唔需要休息。最重要一點就係人工智能係會不斷學習，不斷進步，不斷進化。有啲人會覺得人工智能會令人類滅亡，有啲人就會覺得人工智能會幫到社會，到最後係點其實無人知！
「智能」
人工智能係好多大公司都渴望研發嘅技術，當然人工智能可以幫到人類好多唔同地方，尤其係縮短時間方面。但係人工智能真係可以完完全全取代人類？當然係今日嘅科技同發展或者未必得，只不過當人工智能可以由白紙一張好似啱啱出世嘅嬰兒咁，慢慢學習，慢慢成長，到個一刻你都咪話唔驚。再加上機械化，分分鐘同電影嘅橋段一樣，會取代我哋每一個人。
「取代」
不過人類真係會比科技取代？其實有好多工作都已經比機器取代咗，不過背後都仍然係靠人類嘅經驗同智慧。如果無咗人類嘅智慧，其實又點會有人工智能？所以我唔相信人工智能係可以取代人類，因為至少創意仍然係一樣好抽象嘅嘢。越抽象嘅嘢，就越難轉化成程式。就好似感情咁，係一樣唔可以用程式取代到嘅嘢。
Also published on Medium.
