「傳統」
我其實有啲位真係都幾傳統，我希望每一年都會同老婆同郭大少可以影全家福。因為好多時都係自己影相多過俾人影，所以甚少一家三口一齊影相。而全家福當然就係希望記錄每一年嘅生活，每一年嘅改變，到咗自己老咗嘅時候可以同老婆一齊回味一番。就算依家睇返自己同老婆幾年前影嘅相都覺得自己不再年輕，有時甚至乎懷念兩公婆嘅日子！
「全家」
早前一家大細去咗影全家福，因為郭大少不經不覺已經一歲大，所以希望用相片去將佢記錄落嚟。今日終於有相睇，而真係好耐都無影過全家福，尤其係唔駛顧住部相機嘅同時又要顧及郭大少有無望鏡頭。自己影全家福真係有難度，所以都係搵人影好過。不過影小朋友真係好難，因為佢哋無時停，而之前自己都試過影郭大少，真係影到人都癲！
「山頂」
今次影全家福特登去山頂公園影，因為細個係山頂長大，有好多屋企嘅回憶。而我同老婆嘅結婚相，大肚相，都係係山頂影。所以今年嘅全家福都係去嗰度影嘅原因係記錄我同老婆由拍拖，結婚，生仔嘅每一個階段。當然我哋都變咗好多，而我希望每年都可以去同一個地方影相，盛傳郭家嘅傳統去記錄郭家每一年嘅改變。希望郭大少大咗唔會嫌我老土啦！
Also published on Medium.
