「科技」
現今嘅科技真係好犀利，當然以前要係網上面做用戶測試真係好麻煩。真係要勞師動眾先至可以做少少嘅測試，不過依家就可以隨時隨地，話做就做，超級方便。當然過去幾年都試過唔同嘅產品，但係始終好多都唔係免費，甚至要俾好多錢先至用得。對於香港大部份嘅企業，莫講話要佢哋投資落嚟啲測試工具，就連基本嘅數據分析嘅工具佢哋都唔會俾錢去投資。原因係佢哋對數據分析缺乏相關嘅知識！
「測試」
莫講話香港做數據分析已經落後於其他地方，如果再深入啲講優化，講做用戶測試，香港真係連起步都未起步。話雖如此，世界係不停咁向前行，而谷歌除咗係年頭宣佈咗會推出一整套新嘅數據分析平台之外，今日亦都宣佈其中一個做測試嘅平台會係下個月公開俾公眾使用。本來諗住佢哋會用收費模式，點知出奇意料佢又整個免費版本。谷歌真係遲早壟斷晒整個數據市場。
「免費」
其實係好多個月之前我哋作為谷歌嘅數據分析嘅認證夥伴已經一直有測試過今次推出嘅工具。無可厚非如果你已經用緊谷歌嘅數據分析平台，基本上真係無乜藉口唔用佢個測試平台。當然有好多功能仲有改進嘅空間，但係已經可以滿足到大部份嘅企業需要。講真如果有一個免費嘅平台，你會唔會唔用？好多人就算唔識都會試一試。係時候要準備同客戶推銷嚟個新產品，希望佢哋唔好再話無錢，因為今次又係免費！
Also published on Medium.
