「奇怪」
其實我唔知係乜嘢嘅問題，香港啲小朋友好似從來未去過公園咁，一見到有人吹肥皂泡就好似發咗癲咁，一窩蜂咁走埋嚟。老實講有時真係好怕佢哋會整親郭大少，因為佢哋真係為咗追啲波波，其他嘢就乜都唔理。最奇怪嘅係好似全部家長都覺得你吹波波就預咗咁，老實講我係吹俾我個仔玩，但係如果啲波波飄咗去第二度，我無所謂，但係唔係企係我面前或者身邊等我娛樂你哋！
「公園」
香港好似終於入秋，今年真係好鬼熱，不過真係都就嚟到十月竟然仲話會打風，真係反常到無人有！所以每逢週末，天氣晴朗，香港大部份嘅公園草地都會人山人海。啲外國人一定以為我哋係唔係痴線。近幾次去諗住去西九海濱公園，但係幾次都有活動，搞到入唔到去，真係激死人。有時真係淨係想同郭大少去下公園，跑下草地都咁難。香港其實真係需要多啲親子嘅公園。
「泊車」
香港泊車一直都係一個嚴重嘅問題，但係我真係唔明一啲大嘅公園，個停車場真係得十零廿個車位。大佬呀，個啲公園雖然隔涉，就係因為隔涉所以先至有好多人會揸車，好心就起個多層停車場啦。有時真係唔明政府啲嘢。佐敦谷公園係咁，迪欣湖又係咁，真係好多公園或者海灘都有咁嘅問題。老實講係外國真係到處都係公園，最多都係大時大節有啲大公園會多人啲。
Also published on Medium.
