「問題」
好多時我都係度諗，點解要辛苦自己？做人點解唔可以放開啲？當然人生過咗一半其實已經放開咗好多嘢，因為有時真係無必要為某啲嘢而唔開心。不過仲有好多嘢始終仲未放得開！好多嘢係自己嘅問題，好多嘢我情願發洩返自己身上。有時真係想自己靜靜地咁諗下嘢，不過自己真係有可能攬太多嘢上身，又或者係我根本唔係個種可以一心幾用嘅人，所以搞到自己精神分裂。
「放開」
其實我有時真係幾執著，成個老人家咁，好多嘢真係放唔開。尤其過去一年真係唔知自己做緊啲乜，淨係知道時間一日一日咁過去，忙完都唔知忙乜，根本無沉思過。莫講話放開啲咁面對問題，就連諗下自己之後應該做乜都唔知。好多嘢其實我係有我自己嘅諗法，但係到最後都係要放開啲，但係放開咗又點，原來根本都係無分別。咁點解要放開啲？有時都真係唔知！
「執著」
當然好多事情過去咗就過去咗，我好少會去諗返轉頭，通常都係心情極差嘅時候先至會控制唔到。有時以為過咗去，點知偏偏啲問題就不斷重複又重複。有時都真係唔知係啲乜嘢問題，或者係因為自己性格嘅問題？人點先至可以化啲，唔好咁執著？真係分分鐘到走嗰一刻都未必知道點樣可以放開啲。依家只可以同自己講，是但啦，無所謂啦，係咁架啦。。。
Also published on Medium.
