「兩年」
咁又一年，唔經唔覺已經開始咗嚟個網誌兩年。再一次覺得自己好變態，竟然可以無間斷咁日日寫。雖然近期無以前咁執著要係每晚十點鐘出文，因為真係太忙碌，不論工作或者家庭都有好多嘢要處理。希望自己可以繼續寫落去，不過有時真係唔知寫乜，但係唔緊要，因為寫文係為咗鍛鍊自己嘅耐力。不過人生咁就過咗一半，真係唔經唔覺咁就三十幾。
「三十」
多謝大家今日嘅所有祝福，不過真係好累，基本上今日真係淨係想抖一抖。一諗到自己已經三十有六，真係唔認老都唔得，雖然自己覺得心態仲好似三字頭，不過其實仲有幾年就踏入四張嘢。自己俾自己繼續搞公司嘅時間亦都所剩無幾，希望嚟幾年會有突破。正所謂三十而立，四十而不惑。依家淨係希望唔使憂柴憂米，可以同老婆，郭大少開開心心過每一日就已經足夠。
「失敗」
諗返過去嗰幾年真係唔知做咗啲乜，講真如果你問我，我真係覺得自己無進步過，甚至乎可以話用失敗去形容。正所謂不進則退，事業毫無突破，唯一嘅成就我諗就係有個好老婆，有個仔，有個家，就係咁大把。三十前舒舒服服，三十後攞苦嚟辛，希望四十後可以安安靜靜。而家雖然不求名，不求權，不求利，但係最起碼有一個安穩嘅生活，快樂嘅家庭，睇住郭大少成長就已經足夠。
Also published on Medium.
