「時間」
依家講故仔已經去到一個地步唔使睇錶都大約知道講咗幾多嘢，當然有時都會不自覺講多咗。要將好多好複雜嘅資料，好多唔同嘅信息，消化完再簡化但係又要易明，真係除咗要度個故仔之外，每一頁重要掌握好時間，嚟個真係好鬼難。當然我仲未係去到一個境界可以完全演譯得好好，但係真係睇過好多人講故仔嘅時候，唔知點解好簡單，好易明同好有張力！真係有排都未到家！
「講故」
依家發覺自己除咗係一個打雜之外，真係名正言順嘅講故佬。去到一個地步真係自己都覺得有啲離譜，因為一頁紙得嗰幾張圖，幾粒字，但係就要將個故仔嘅重點講出嚟。當然講故佬同吹水怪係好唔同，因為唔係天馬行空。我諗我遲啲會唔會去到一張白紙都可以講故事，因為真係越嚟越簡化。如果係咁，齋講得啦，只不過到時啲人又會話你吹水，因為連一張紙都無！
「語言」
自己做個唔同嘅工種，當然發現咗唔同嘅工種會有自己嘅一套溝通方法，但係嗰啲術語就未必個個人明。香港好多時都會中英夾雜，已返咗嚟香港咁耐，依家用廣東話多過英文，甚至煲冬瓜都少咗好多。其實我自己真係習慣用英文講故仔比較多，不過而家疏於練習，真係唔知可唔可以返轉頭。有時覺得自己嘅英文不斷倒退，但係就因為日日寫嘢，啲中文就反而好咗啲。乜嘢玩法呢？
Also published on Medium.
