「賞月」
本來今個中秋節話會打大風，老實講近年嘅中秋節真係好反常，唔單止好熱，依家分分鐘仲會話打風。當然大家無得賞月就自然覺得有啲掃興，不過好彩個風打唔正，仲見到月亮。本來諗住同郭大少去完太爺太嫲屋企食完飯之後去維園睇花燈，不過真係好多人，又迫又熱。老婆話記住以後每年互相提大家大時大節唔好再去人多擠迫嘅地方。因為人大咗真係好怕人多嘅地方！
「燈籠」
其實如果你問我，我最鍾意玩嘅燈籠都係傳統要點蠟燭嗰啲燈籠。因為傳統燈籠先至有嗰種節日嘅氣氛！依家好多小朋友嘅燈籠係唔同嘅卡通人物，以取而代之嘅就係啲燈籠用燈泡再唔係蠟燭。老實講當然小朋友玩嘅時候係安全啲，但係就好似無咗嗰種氣氛。因為細個嘅時候玩燈籠唔係俾風吹熄啲蠟燭就係支蠟燭則埋一邊燒著咗，搞到最後無得玩。不過以前啲燈籠確實好玩啲同有氣氛啲。
「傳統」
今年係第二年同郭大少過中秋，而當然唔少得嘅就係買一個燈籠俾佢。雖然個燈籠俾佢拎住係會拖晒地，而個燈籠本身都同佢差唔多大，所以佢當咗係一隻公仔咁攬住咗佢。希望等佢大啲嘅時候就可以同佢玩返我哋細個玩嗰種燈籠，同攞個月餅盒出嚟點臘燭玩。人大咗真係會老餅啲，鍾意返啲傳統嘢多過啲潮流嘢。希望到時郭大少唔會話我哋老餅，玩啲咁嘅嘢啦！
Also published on Medium.
