「服務」
好多人今日嘅重點都係討論蘋果嘅發佈會，而當中最希望嘅係香港會有手機更新嘅服務推出，點知香港無份，所以有啲失望。其實個計劃都真係幾吸引，又唔使煩每次要賣咗部舊嘅手機先至可以買部新。而每年當佢出新款嘅時候又唔使諗換唔換好，所以真係啱我哋嚟班粉絲。老實講我依家最渴望嘅係新嘅手提電腦嘅發佈會，因為真係要換，真係等到頸都長。
「蘋果」
好多人都應該同我一樣都好關心今朝蘋果嘅產品發佈會，當然事前同以往一樣都有唔同嘅消息流出。其實蘋果近幾次嘅發佈會都好鬼悶，而今次首先打頭陣嘅都係隻智能手錶。老實講真係無乜特別，只係改短咗少少嘢。至於電話方面亦都無乜太大嘅驚喜，最多都係個雙鏡頭咁大把。反而最吸引大部份人嘅係對無綫耳機，因為你啲先似返蘋果創新嘅風格！
「介紹」
除咗討論產品之外，好多人都對於蘋果會點樣介紹第七代嘅手機。眾所周知之前三星出咗部電話叫「碌柒」，所以好多人都好好奇今次蘋果會點處理。當然大家知道廣東話個「七」字同「柒」字之間嘅關係，所以除咗香港之外，其實中國同台灣都出事。中國翻譯成「七，在此」，而台灣就翻譯成「就是七」！老實講七嚟個字真係好難搞，因為真係好容易俾人惡搞！
Also published on Medium.
