「消失」
相信今年應該有好多人都出嚟投票，因為大家都希望改變過去幾年嘅社會風氣。今年嘅新聞特別多，當中當然唔少得啲公公婆婆被安排去投票，而自己都遇到一個問題就係無啦啦無咗超級區議會嘅投票權。我問佢哋嘅時候，佢哋話我改地址嘅時候無選擇要登記做選民。老實講我改地址咋噃，唔係改我登記做唔做區議會第二功能界別嘅選民。所以即刻登記返，如果唔係下次又無得投！
「投票」
嚟排寫咗好多同立法會選舉有關嘅文章，而今日當然使用自己公民嘅權利，投票俾自己相信嘅立法會候選人。直至今晚十點半，其實仲有好多人排緊隊投票。按選舉條例，只要係十點半之前排隊，其實你係有投票嘅權利。當然點解到最後先至有咁多人去排隊投票？唔通大家都希望打亂建制派嘅部署等佢哋無機會反擊？當然結果仲有排等，不過認真希望可以改變現狀。
「數據」
講真建制派嘅配票方式真係好犀利，而因為佢哋好團結，而且好識得用數據，所以好多時都好有策略咁爭取議席。如果我哋個個都唔出嚟投票，老實講，我哋嘅將來真係拱手相讓俾人哋。而今年有好多所謂嘅民調同分析，但係如果你問我，我覺得實在太過公開，如果我係建制派，真係會攞住啲數據同你打。所以我都唔知係一件好事定係壞事。點都好希望真係可以踢走保皇黨啦！
Also published on Medium.
