「生活」
有小朋友嘅生活真係快到嚇死人，好似無幾耐之前先至話啱啱一歲。有時睇番郭大少啱啱出世啲相真係幾好笑，不過人哋話三歲定八十，我話係三日定八十。點解？因為佢永遠有一個永不改變嘅笑容，好希望佢一直保持嚟個大情大性嘅性格，唔好似我乜嘢事都收收埋埋。今個月終於識得叫「嗲啲」但係其實我一直叫佢嗌我做「爸B」，都唔知佢係邊度學返嚟。
「馬騮」
話咁快又過咗一個月，又係時候記錄郭大少今個月嘅趣事。今個月佢開始學行，其實之前佢都識得扶住啲嘢行，不過自從去完蘇梅旅行之後，佢終於知道要着鞋先至可以落地。又因為係蘇梅日日都可以係酒店房爬來爬去，返到香港豆膶咁細嘅屋企依然想四圍爬。老實講真係怕佢會撞親，因為去旅行嘅時候都試過，嚟個頑皮仔真係呢，簡直係一隻甩繩馬騮！
「教育」
教育一個小朋友真係好難，依家真係諗唔到點樣可以等佢食飯嘅時候可以坐定定。佢專注力真係好差，好分心，如果唔係自己最鍾意食嘅嘢，食兩食真係會唔識。當然老婆最擔心佢唔夠飽，因為本身已經唔係肥嗰啲。不過係網上面睇咗好多文章都講嚟個問題，所以慢慢試唔同嘅方法等佢知道食飯係要坐係到食。真係唔想追佢九條街先至食嘢。
Also published on Medium.
