「機會」
有時有機會又煩，無機會有煩。守株待兔一直等其實唔係辦法，所以有時機會係要自己製造，自己爭取，自己把握！當然自己慶幸嘅係過去咁多年都有唔同嘅機會可以俾自己更上一層樓，而當然有啲機會係自己爭取，有啲係人哋俾嘅機會。所以我好珍惜每次人哋俾我嘅機會，因為其實某程度上係代表人哋肯定自己嘅能力。一係唔做，要做嘅就要做到最好！
「選擇」
好多人一生都係等緊一個機會，而當然有啲人有多個一個機會。但係當機會嚟到嘅時候，你會點樣選擇？有時真係幾難去決定，但係無論個決定係點都係自己揀嘅，所以無得返轉頭無得後悔。當然機會唔係會經常出現，所以真係要深思熟慮，因為通常機會出現嘅時候都會係你嘅人生交叉點。有得必有失，點樣揀？確實係好難嘅一件事！
「等待」
其實到嚟刻為止我都係等緊一樣嘢，就係數據分析行業嘅興起。雖然係好多地方都已經好流行，但係香港仍然好落後。係過去嗰七年當然我唔係齋等，而間唔中都會有一啲機會出現，但係左度右度都係決定放棄嗰啲機會，繼續堅持自己嘅信念向前行。不過有時真係有啲好吸引嘅機會自己都唔想錯過，所以有時真係好難決定。
Also published on Medium.
