「人生」
近日社會實在發生咗好多不愉快嘅事件，而無論係乜嘢原因導致都好，其實都令人反思好多問題。好多人經常都會講活在當下，珍惜眼前人。而事實上有幾多人真係做得到？要係茫茫人海中認識到一個人，其實真係緣份，而如果有一個人可以一齊同你經歷自己人生就更加難。人生就係咁，好多嘢都係過眼雲煙，何必執著一啲無意義嘅事情。
「脆弱」
人越大，諗嘅嘢就會越多，亦都慢慢意識到人其實係好脆弱，今日仲為緊生活而奔跑，而聽日亦有可能一無所有。我相信每個人都曾經會諗如果聽日係自己人生嘅最後一日，咁你會做啲乜？可能大家嚟刻都會諗究竟有啲乜嘢未做，有乜嘢遺憾，等等。而點解會講呢個話題？其實想大家諗吓人生其實究竟係咩嘢嘅一回事，人生嘅意義係啲乜。
「面對」
如果你問我如果知道聽日係自己人生嘅最後一日，咁今日我會做啲乜？當然係希望開開心心咁同身邊嘅人過每一分每一秒，唔需要做任何嘢，只要陪伴身邊已經足夠。見到一個朋友好正面同勇敢面對自己嘅病嘅時候，雖然覺得天意弄人，亦無嘢可以幫到手，有時都好無奈。但係佢教曉咗我要勇於面對人生，相比起自己依家要面對嘅問題，其實真係好小事！
