「分別」
我經常講郭大少係同其他小朋友有啲唔同，佢係一個觀察力同學習方法都好似有啲分別，但係食嘢同飲水方面真係搞到我同老婆一頭煙！本身佢已經唔係肥嗰啲，依家餵佢食嘢真係好頭痕，鍾意食嘅就好肯食，唔鍾意嘅就點氹都唔識。真係激鬼死！好彩嘅係多得老婆過去嗰十一個月堅持餵人奶，所以相對病痛都比較少。只係今個月有少少鼻水同屙爛屎，所以穩陣起見都係去睇醫生！
「回顧」
郭大少今日十一個月大啦！今個月同佢去咗人生嘅第一個旅行，而相比起平時去旅行影相真係影少咗好多，因為要湊住佢去旅行真係要兼顧好多嘢，不過亦因為咁反而親子時間多咗。佢依家真係好有主見，要個樣嘢佢會指住佢話俾你知我要，而唔要嗰樣嘢就會擰歪面同耍手擰頭。不過最大鑊嘅係佢識得爬上梳化，真係好驚佢跌落嚟，雖然佢依家識得腳落先，但係有時佢一急就真係會頭落地，認真要睇到實。
「懷念」
前幾日去探一個老友啱啱出世未夠兩嘅細女，真係好懷念郭大少啱啱出世細細粒，食完就瞓嘅時期。家陣真係無乜可能，真係好鬼有主見！不過其實又好開心，因為見到佢健健康康咁成長。老實講真係好鬼矛盾，有時又唔想佢哋大得咁快，有時又希望佢哋快啲大。不過相信好多父母都會懷念自己嘅仔女啱啱出世同癡實自己嘅時期！如果你問我，當然就梗係唔好大得咁快啦！
Also published on Medium.
