「理念」
係工作上面，有時真係睇下你好唔好彩，因為要遇到同你理念一樣嘅人其實真係十分之少。而如果你所管理嘅團隊同你嘅理念唔一樣嘅話，有時真係會幾吃力。其實理念係啲乜嘢？簡單嚟講其實係一個願景或者一個共同嘅使命標！當然人嘅目標同理念通常都係相輔相成，而且亦都會隨著時間而改變。但係如果經常改變理念就會令人覺得模糊同無可適從！
「選擇」
我相信我一定唔係一個生意人，因為好多時我都真係會同你講理念！當然我過去嗰七年嘅理念係圍繞住數據分析而行，而好多時好多人同公司都唔覺得數據嘅重要性，甚至乎覺得我哋所做嘅對佢哋嚟講無用。所以通常我會選擇放棄，因為無謂晒時間係一啲理念唔一樣嘅人同客戶身上。因為到頭來你辛辛苦苦做嘅嘢，就算做得幾好佢哋係唔會識得欣賞！
「靈魂」
好多時創業係好講求理念，因為無理念嘅話其實就等同間公司無咗個靈魂！所以每一間公司都需要一個理念！而我嘅理念係希望透過數據分析可以等唔同嘅企業可以更加了解佢哋嘅客戶。與此同時透過數據作出一個科學性嘅營運同發展模式！所以首先佢哋相信數據，如果唔係其實可難同佢哋合作。慶幸嘅係依家大部份我哋嘅客戶係同我哋嘅理念一致！
Also published on Medium.
