「挑戰」
郭大少今日足十個月啦！而今個月應該係佢出世已嚟最具挑戰性嘅一個月！今個月終於出咗啲牙仔，而我哋一直淨係留意佢下面個兩隻門牙，點知佢上面出先。佢今個月郭大少特別扭計，而極有可能係因為佢一次過出四隻門牙所導致。依家除咗爬得快之外，佢仲識企起身同好似樹熊咁向上係咁爬！真係睇少眼都唔得掂。唔知以為佢係猴年出世！
「長大」
老實講郭大少唔係肥肥嗰隻，但係就手長腳長，超級靈活。不過真係太過活躍，就算我再加我老婆兩個人，有時真係舞佢唔掂。佢得過十個月人仔，講真你又真係唔可以阻止佢嘅好奇心，但係有時佢又真係好鬼死危險！而家佢講多咗嘢，有時都唔知係唔係叫我，是但啦當係先啦！同時佢勁有要求同自己嘅想法，有時真係勁硬頸同固執！最好笑嘅都係識得郁下隻手同人打招呼！
「懷念」
十個月過去，依家睇返啲相真係覺得佢哋大得好快，唔講淨係睇樣真係會以為郭大少已經有一歲。最慶幸嘅就係佢依然係一個好開心嘅小朋友，笑點仍然好低。有時工作雖然壓力大，但係見到佢真係無所謂啦。老婆仍然堅持餵緊人奶，我哋兩個依家變咗棵樹，因為郭大少係一隻樹熊！依家真係希望佢唔好大得咁快，因為已經唔捨得以前細細粒嗰個郭大少！
Also published on Medium.
