「講笑」
好多時你會以為我嬉皮笑臉，樣樣嘢都好似玩玩下咁，又成鬼日講笑。其實我只不過係掩飾緊我啲負面情緒，因為凡事我都會向好嘅方面諗，事關無嘢係解決唔到。處理逆境就係要平常心，要處之泰然，唔好轉牛角尖。只不過真係講就容易做就難，有時真係俾啲負面嘢搞到自己好鬼忟憎！間唔中真係會失控！
「世事」
世事難料，好多嘢係你無辦法去控制，而唯一你可以控制到嘅就係自己嘅心態。每當你有一大堆嘅負能量纏繞你嘅時候，你就要搵到一啲正能量去對抗。每年我都會有一啲嘢想做，但係偏偏每年都有啲嘢頂住頂住，當準備向前，有被嘢拖住！所以今年平常心，唔好諗太多，覺得要做，要變嘅，就豁出去先！
「隨意」
話咁快又差唔多過咗半年，又係唔知做咗啲乜。人生好多時就係咁，過吓過吓又一日，尤其而家多咗郭大少，啲時間越嚟越唔見洗！今年其實有好多唔開心嘅嘢，但係真係唔想去理會佢，事關真係無咁嘅精力去諗佢！或者你可以話去逃避，但係講真我有更加重要嘅嘢要去處理去解決！所以是但啦，隨遇而安啦！
