「教書」
如果你問我鍾唔鍾意教書，其實我覺得唔錯，但係一定唔可以係全職。點解？教書係希望將自己所識嘅嘢傳俾下一代，但係其實全職教書係仲有一大堆行政嘅嘢要做，而且如果脫離咗職場嘅話，基本上所好多嘢都只係停留係學術同理論方面，因此而缺乏咗實踐嗰部份。所以每年都會返去大學講下數據分析，希望培養多啲人才！
「考試」
眨下眼又過咗一個學期，今日返學校去監考自己班學生。其實每一年都會諗同一個問題就係究竟我班學生有無學到嘢同有無應用係工作方面？講真我唔知佢哋其他科目考試份卷係點樣，但係我要佢哋做完選擇題，再加兩條短文同一個案例分析，仲要佢哋坐喺度三個鐘。講真我都會覺得辛苦，但係真係希望佢哋學有所成！
「彌補」
依家除咗返大學教書之外，有時都會幫其他人教一兩堂書。當然我唯一嘅宗旨係同數據有關啦！有時真係覺得幾好笑，因為自己無咗大學嗰個時期，無經過大學畢業，係直至到前幾年先至去再讀書，拎返個學位。唔知係唔係一直都想過返啲大學嘅生活，所以不知不覺已經教咗五年書。或者自己係用緊另外一種方法去彌補無係大學完成學位嘅一種遺憾。
