「挫敗」
照顧小朋友有時真係幾頭痛，好多嘢都無從入手，有時仲慘過創業。點解？因為失敗咗至少知道衰啲乜，但係對住郭大少有時真係投晒降。基本上每日都係咁比啲新嘅挑戰你，不斷挫敗你，但係你又唔可以放棄，只可以頂硬上。所以如果你話創業難，我會話湊仔更難！最近佢好多時連我都唔要，真係有啲灰。希望遲啲會正常返啦！
「頭大」
係嚟個世界上無一個小朋友會係一模一樣，就算係雙胞胎都好，其實性格都會好唔同！而近排要處理郭大少嘅嘢真係多不勝數！首先每次換尿片都好似打仗咁，因為佢經常翻來翻去，本來幾十秒搞掂嘅嘢要搞成幾分鐘。此外而家識得企起身，真係睇少眼都有可能出事，事關佢會為求目的堅持要做到佢想做嘅嘢。然後就當然係食嘢，因為成日都食一兩啖就算，瞓覺大過天！
「健康」
近排真係有啲擔心郭大少，因為佢經常唔肯食嘢，就算食都唔係食得好多。本來食固體食得唔錯，但係突然有唔肯食，連啲習慣都唔同晒，真係頭都大埋！最怕嘅就當然係佢瘦瘦豬，怕佢唔夠營養，怕迫佢食嘢會更加令佢唔想食嘢。而家只可以不斷嘗試俾唔同嘅嘢佢食，因為真係怕佢大個之後會有偏食嘅問題。
