「問題」
相信大家都會因為某些原因去杯葛某啲公司嘅產品，而好多外國嘅例子都涉及種族或者政治有關嘅議題。就好似中國人罷買日本貨，外國人罷買由血肉工廠所製造嘅產品。而當大家雄心壯志創業嘅時候，一個唔小心就會被捲入相關嘅問題，到時候真係神仙都搞唔掂！而近日香港都有同樣事件發生，所以話有時有啲嘢真係要萬二分小心！
「政治」
老實講我真係好怕一啲嘥時間嘅嘢，所以如果係工作層面要牽涉到啲公司政治嘅問題，通常我都選擇離開，唔好搞我。政治嘅嘢真係嘥時間！你插下佢，佢插下你，互片幾百個回合，到最後兩敗俱傷真係為啲乜。所以真係唔好搞我，而好多時真係公還公，私還私，盡量唔好牽涉其中。如果唔係真係唔知幾時踩中地雷，到時真係關公現身，周身蟻！
「香港」
而家係香港做任何嘢其實都變得好政治化，當然好多人會因為想得到某啲機會而選擇背棄自己一貫嘅政治取態。如果你話個人嘅政治取態唔會影響到公司嘅業務，講真係香港真係有啲難。所以做任何嘢之前真係要睇清睇楚，盡量避免同政治掛勾。雖然好多時有啲機會係好吸引，但係做人真係要有宗旨，唔可以因為利益而埋沒理性！
Also published on Medium.
