「照顧」
之前郭大少出世嘅時候，好多時都係我湊住佢，所以佢唔會唔痴我。好多時瞓覺亦都係我氹佢瞓覺，所以佢無話淨係我或者我老婆。佢好多時兩個都會跟，除咗真係佢要食嘢我真係無辦法！有啲嘢係我永遠都無辦法取代到媽媽嘅！不過近日就有啲改變，唔知係唔係因為而家老婆湊佢多咗，而我好多時朝頭早都要去做嘢，所以佢而家好似痴我老婆多啲！
「呷醋」
今日老婆同我帶咗郭大少去啲媽媽聚會，而近排郭大少好唔鍾意我，好多時都唔要我抱佢要好似隻樹熊咁捉實我老婆。就算我想伸隻手去抱佢，佢已經擰歪面唔睬我。超級灰爆！但係今日因為有其他小朋友，每當我同其他小朋友玩甚至乎抱起其他小朋友，郭大少就即刻望到實，之後仲好快咁爬過嚟我到要我抱，係真係比佢激死！因為佢勁呷醋！
「趣事」
其實之前我有次餵緊佢食野，老婆攰得滯攤左喺梳化休息。而我家大哥見我老婆難得唔駛抱住細佬，所以即刻走埋去搵我老婆！當郭大少睇到之後，佢發出非常不滿嘅聲音。之後我老婆怕佢扭得太勁於是就埋去抱起佢同埋解釋比佢聽唔準呷醋！點知當老婆抱佢坐埋去大哥隔離，郭大少突然衝住佢做咗個鬼臉，然後好得戚咁攬到我老婆實一實！嚟次應該係第一次佢呷醋！
Also published on Medium.
