「爬行」
每個小朋友都要經過爬行呢個過程，之前我同老婆都怕郭大少佢直接跳過爬行嚟個階段，因為佢一直淨係翻身但係唔爬。佢最鍾意就係企起身，有時仲想學行咁，所以都怕佢係嗰啲未學爬先學行嗰啲小朋友。而前嗰排，老婆帶佢落過幾次屋企樓下個會所，佢淨係望住其他小朋友觀察佢哋，之後冇幾耐返到屋企就開始識爬。依家真係越爬越叻，越爬越快，真係開始看牛牛！
「比賽」
今日同老婆帶郭大少去佢人生第一次嘅爬行比賽！之前見佢係屋企爬得好開心，所以就帶佢去玩下。當然輸贏唔係最重要，因為真係想佢出去玩下。我哋本來都擔心因為外面嘅環境同屋企唔同，拍佢會怯場。點知都未開始佢已經想爬，之後無得爬就開始忟憎。而到咗開始嘅時候，因為周圍好多嘢吸引咗佢，所以起步慢咗，但係都最後竟然爬第二，真係好叻仔。
「參與」
當然去比賽唔係在乎佢贏定輸，只係見佢喺屋企爬得好快。所以見到有機構舉辦爬行比賽就帶佢出去見下啲大場面！就算今日郭大少一步都無爬到都無所謂，因為佢真係超額完成！真係冇諗過佢會一啲都唔驚，仲要無放棄到一直爬到比賽時間完結。之後比佢睇返我拍嗰條片真係度好開心咁笑！時間過得真係快，依家佢真係四圍爬，到咗佢識行識走真係唔知點算。
Also published on Medium.
