「分享」
好多時係創業路上都會同唔同嘅人分享自己嘅構思，方向，問題等等嘅嘢。所以漸漸身邊就會有好多不同嘅意見同聲音，而當中一定有啲有用而且好實際嘅嘢可以幫到自己。有時更加可以透過同其他人分享而解決目前面對緊嘅問題。不過有時不同嘅聲音反而變成自己嘅負累，因為唔同人有唔同嘅見解，未必樣樣都識合自己，變相弄巧反拙。
「問題」
過去身邊都有好多朋友係創業同打工之間徘徊，當中我發現其實都有一個共通點就係佢哋都識得好多人。而越係識得多人就越傾得多嘢，導致佢哋慢慢無晒方向，因為覺得樣樣嘢都好似可以做。但係越諗得複雜，越做越多嘢，反而導致駕馭不下所有發生嘅事情，最終得不償失。結果負債嘅負債，想做嘅無一樣嘢做好，兩頭唔到岸。試問人生真係有幾多時間同精力去浪費？
「分辨」
有時傾得太多真係未必係好事！事關有時會將好簡單嘅事情變得好複雜，而且會慢慢將專注力就會分散到太多地方。原本傾訴同聆聽係一件好事，只不過過量就會變成雜音，自己亦會因為同每一個人傾完嘢之後再去思考一大輪。到最後就會唔集中做好應該要做嘅嘢，根本嘅問題亦都無辦法解決。所以其實真係要專注做好一樣嘢，而且要分清楚邊啲聲音係可以幫到你。
