「相似」
好多時有人會話物以類聚，近朱者赤，近墨者黑，所以大部份嘅人都會選擇同自己比較接近嘅人相處。但係久而久之因為大家嘅成長環境，工作環境同生活環境嘅改變，原本大家相同嘅思想同理念都慢慢出現變化，而到最後更有可能兩極化。人與人嘅關係就係咁，佢會不斷改變，而要做到真正嘅志同道合其實分分鐘係同你相反嘅人！
「緣份」
要搵一啲同自己性格接近嘅人其實未必好難，但係要搵一個同你完全相反而且可以相處到嘅人就真係好難。人係無十全十美亦都唔會一帆風順，人生總有高低起跌。但係要係嚟個人海入面搵到嗰班或者嗰個可以填補你不完整嘅人生，真係好睇你嘅緣份。當然有啲人好容易搵到，但係有啲人可能一世都未必會搵到，所以真係一個「緣」字！
「改變」
正所謂一凹一凸，要搵到阿凹或者阿凸真係緣份。就好似兩公婆咁，點解當初會走埋一齊？當然就係佢哋各自係對方身上搵到一啲凹同一啲凸，不過係唔係真係所有嘢都咁完美？事實當然就係唔係啦。最重要其實係不論凹定凸，每當由不平衡變成平衡，由平衡變返不平衡嘅時候，大家都要記得係茫茫人海入面要搵到對方係一件好難嘅事，唔好因為一啲事同物以令凹凸嘅關係改變。
