「顧慮」
依家有咗小朋友，去旅行真係一個大項目。除咗希望唔好影響佢哋嘅作息時間，仲要諗下嗰個地方需唔需要行得好多。因為人多嘅地方帶小朋友去真係比較麻煩，唔知可以顧邊樣好。就算係香港我哋都唔會去人多嘅地方。至於飲食方面，依家開始食固體但係又未食得大人嘢，所以又係一大難題。最緊要嘅當然係休息，最擔心嘅當然係如果佢瞓唔慣陌生地方，到時又係搵著成家人嚟搞！
「旅行」
自從上年趁郭大少出世前同老婆去完旅行之後，依家差唔多有一年無去過旅行。對於好鍾意去旅行嘅我哋，而家要湊住郭大少真係去邊都要諗吓。因為一諗起其實係我哋兩個想去旅行，而郭大少其實都係被逼同我哋去。當然我哋亦都唔想辛苦咗佢同辛苦我哋自己。雖然知道會有幾多問題，亦係網上面睇到好多人嘅分享，但係我都希望任性一次同佢哋試下出走幾日。
「計劃」
其實一直我都有諗同老婆去邊度好，只不過諗咗好多地方都好似唔係太過適合，所以經常諗郭大少幾大，去旅行會唔會好辛苦等等嘅問題。另一邊廂當然知道老婆好想出去行下。日日湊仔真係需要放下假，都要放鬆下自己。不過老婆好多時都擔心個仔嘅起居飮食，所以講講吓又打消去旅行嘅念頭。依家唯有繼續積極搵啲識合一家大細嘅地方同佢哋去開心吓啦！
