「創業」
我經常講創業係有苦自己知，而且其他人係好難介入佢哋嘅空間。所以唔好話你身邊嘅人，甚至乎佢哋自己都未必明白自己。雖然佢哋好多時都會同現實脫鈎，而往往每個人都有自己嘅包袱，因此抗拒同其他人分享問題。因為就算佢哋想搵人傾訴，要搵到同路人其實唔係咁容易。況且好多時大家都想一力承擔當面對問題，所以只會係百上加斤！
「失眠」
上個星期睇到某個前輩講到一啲好多創業嘅人，即係所謂嘅老闆經常會遇到嘅問題。而咁啱早幾日亦都有另一位朋友係網上面呻咗兩句。其實自己開公司真係好容易痴線，因為每日都有好多嘢要擔心，而因為擔心而積壓嘅壓力導致失眠。咁其實係唔係因為我哋犯賤？其實大家都清楚路係會難行，但係亦要行，因為唔使再擔驚受怕！雖然好矛盾但係偏偏亦都係事實！
「隧道」
創業嘅人越嚟越多，但係過去幾年一直堅持嘅真係十隻手指數得晒。當中當然有融資，被投資，賣盤等等，不過每個故事嘅背後又有幾多人知？而對我嚟講最緊要係相信隧道有入口自然就有出口！有可能今日仲未見到隧道嘅另一邊嘅風景，但係聽日得唔得？唔得，咁後日呢？都唔得？咁大口日呢？總言之總有一日你會走出嚟條漫長嘅隧道，而隧道入面其實係有燈火為你引路！大家一齊加油！
Also published on Medium.
