「寵物」
係我未認識我老婆之前，其實從來都無養過貓。細個淨係記得屋企有龜，雀仔，金魚同狗仔。當然唔同嘅寵物有佢哋自己嘅特質同個性，而係香港我覺得養貓會比較識合。因為佢哋自理能力比較高，但係當然唔係話你可以完全唔需要理會佢，只不過你會唔會日日有時間同狗仔落街散步，跑步？但係講到尾，養任何寵物都應該要負責任，唔好因為一時衝動。
「貓咪」
真係唔講唔知完來二月二十二日係被稱爲《貓之日》而且起源係來自日本。原因係日文二月二十二日嘅發音好似貓叫嘅聲音，所以就係咁，二月二十二日就被定為《貓之日》啦！如果大家有留意開我嘅文章都會知道我屋企係有兩隻貓，而咁啱我老婆同個仔都係獅子座，所以真係一屋都係貓。除此之外，我老婆超級鍾意叮噹，所以我屋企其實日日都係《貓之日》！
「環境」
通常啲貓會好害怕去一啲新嘅環境。唔好講搬屋咁大件事，淨係帶佢哋睇醫生佢哋都已經會驚到震。之前兩隻貓係老婆舊居搬去我度嘅時候，兩隻貓都好驚，搵地方匿埋咗幾日先肯出嚟。到咗今次搬屋，唔知點解佢哋兩個好似已經好熟個環境，而且好快適應咗新屋。當然我哋覺得好出奇，因為之前驚佢哋又會匿埋幾日唔出嚟。依家就當然安樂晒啦，因為佢哋兩個真係超級習慣間新屋。
