「發展」
今時今日如果淨係靠讀書嘅話，除非你係專業人士，如果唔係嘅話，你身上面如果真係得單一技能嘅話，相信將來喺唔同地方嘅發展未必比多重技能嘅人有勝。就算只係皮毛都好，識多樣嘢點都會有好處。所以好多時我都講，你身上有幾多把刀可以用。就算一把刀廢咗，至少你身上仲有好多把刀可以用。不過專有專嘅嘅好處，雜有雜嘅好處。真係好睇個人嘅選擇。
「萬能」
好多人認識我係因為關於數據分析，而好多人都以為我一出嚟做嘢就已經係做關於數據分析有關嘅工作。但係其實認識我比較耐嘅朋友都會知道我其實係做設計出身，而係過去十幾年，我其實做過好多唔同嘅工種同行業，只不過大部份時間係同資訊科技有關。當然除咗同工作以外我仲有好多興趣同技能，只不過唔係樣樣精。但係有時嚟啲知識好多時你唔知幾時係工作上會有用。
「好奇」
有時自己覺得好似一把萬能刀，未必樣樣都有深入認識，但係至少知道應該知道嘅知識。當然興趣大啲嘅題目我會鑽得深啲，就好似設計同數據分析。如果你問我識唔識玩某種運動，我相信大部份嘅我都識玩，但係唔係樣樣都叻咁啫。其實講到尾自己好奇心重，樣樣都想玩下，樣樣都想試下。不過有啲嘢我打死都唔會試同做。我諗每個人都有啲嘢係過唔到自己嘅心理關口嘅。
