「開年」
廣東人都有一個傳統就係農曆新年嘅第一餐飯叫做開年飯。而好多公司都會係揀一啲好日去開市，希望來年可以賺多啲。而開年飯當然唔少得嘅就梗係食一啲有意頭嘅菜式，當中包括髮菜蠔豉，燒肉乳豬，等等。而我最最最鍾意嘅就係舞獅！雖然有時大鑼大鼓好鬼嘈，但係咁先至係新年㗎嘛！不過開年飯就梗係唔少得團拜同收開年利是啦！
「開工」
今日係年初八，好多公司都會選擇係今日去開年。因為好多人都會選擇係今年嘅農曆新年放多兩日假，咁就可以有個長嘅假期。所以其實好多打工仔都係今日先至返工。當然自己公司都係揀今日同員工食過開年飯，希望今年個個身體健康，公司生意蒸蒸日上！我通常都係同公司嘅同事輕輕鬆鬆飲個茶，派開年利是，希望大家今年繼續為公司打拼。
「工作」
真係話咁快過農曆新年咁就過咗，同時今日食完個開年飯之後，就真係真真正正開年。事關通常過完農歷新年之後大家都先至會收拾心情去應付來年嘅工作。雖然話今年冇乜目標，順勢而行，但係都希望今年猴年可以大展拳腳。而且公司已經踏入第六個年頭，所以真係希望有所改變。無人知今年會係點，見步行步啦。最緊要開開心心，健健康康就得！
