「送花」
唔經唔覺已經係第五個年頭，時間真係過得好快。仲記得上年老婆無啦啦講話唔好送花俾佢，話嘥錢。不過轉過頭話無花收，有啲唔開心。所以今年當然要買返紮花俾老婆啦。我不嬲都幫襯開尖沙咀某間花店，因為佢哋價錢唔會坐地起價，而且服務同質素都有保證。點知今日蝦碌咗，將我同另外一個客戶嘅花調轉咗。好彩佢哋舖頭近我食飯嘅地方，佢哋即刻整個紮俾我。如果唔係我殺人都似！
「情人」
又係一年一度嘅情人節，今年因為好忙，真係差啲連情人節都忘記咗。而今日真係好難得同老婆出去拍下拖，因為自從郭大少出世之後，我哋兩公婆真係好似直升機家長咁，將整個生活嘅中心完全轉移到佢身上。今日趁住情人節，所以同老婆去拍下拖，過返啲二人世界嘅生活。只不過因為唔放心個仔，所以都只係出去食咗個晏同睇咗場戲，之後又返屋企過返三人世界。
「拍拖」
真係好耐好耐無同老婆輕輕鬆鬆咁去拍下拖，今日起身搞掂個仔之後就出去食飯。當然我個人比較挑剔食嘢，所以揀餐廳其實都揀咗好耐。之後睇完個菜單，最終都係揀咗一間法國菜。雖然無得食晚餐，但係個午餐認真唔錯。個價錢同食物嘅水準都非常合理。當然我想同老婆可以食個燭光晚餐慢慢享受，只不過真係唔放心丟低個仔太耐時間，希望佢大啲嘅時候我同老婆可以放心啲啦。
