「水波」
其實水波爐係啲乜嘢？佢係一部可以蒸嘢同焗嘢嘅爐，而最大賣點就當然係比起微波爐健康同可以整更多嘅嘢食。當然係網上面見到好多唔同嘅食譜，同時個爐真係集幾樣嘢於一身。最主要嘅係一直想換咗依家屋企個部微波焗爐，事關焗嘢嘅功能真係嘛嘛哋。好多時都想焗吓雞，羊架同蛋糕等嘅嘢，但係就因為無焗爐，所以一直無得整！所以水波爐係一個唔錯嘅選擇！
「熱話」
近排越嚟越多人係度講水波爐，而我老婆好耐之前已經同我講想買好耐。近日一路係度諗緊邊一部好，因為樂聲最近出咗一部相對比較平嘅水波爐，而且好多人都去入手。當然亦都引起我哋嘅興趣啦，只不過睇完實物之後，我覺得比較細，雖然真係平好多同細好多，但係鍾意煮嘢食嘅我就覺得都係要買返部大啲可以整多啲嘢嘅爐。最後都係同老婆講我都係買返東芝嗰部！
「烹調」
雖然仲未成功入手，但係已經開始留意水波爐嘅食譜。煮嘢同科技一樣都係日新月異，就算同一道菜式都可以有好多唔同嘅烹調方法。而且好多以前好花時間同好難煮嘅菜式，只要用一啲新嘅廚具就已經可以好快同好簡單咁煮出嚟。對於我呢啲大部份時間都係煮西餐嘅人嚟講，焗嘢嘅機會真係多過蒸嘢。不過有啲甜品都需要用蒸嘅方法。真係希望快啲入手試吓啲新嘢！
