「時間」
依家有咗郭大少之後，我同老婆都投放好多時間比佢，因為我哋都覺得小朋友成長階段係唔可以錯過。所以盡可能都希望見證佢嘅每一個階段。你有可能話我哋怪獸？但係如果你錯過咗佢成長個幾年，真係無得返轉頭，到時你喊都無謂。其實好多外國研究到會講其實咁樣係會對孩子嘅成長係有好處！只不過係香港真係因為環境問題所以好多家長都無辦法投放太多時間俾小朋友。
「節目」
今晚同老婆睇完一個電視節目關於香港嘅全職媽媽問題，事實上要係香港做全職媽媽或者爸爸係好難。因為大部份香港嘅工作都無可能俾到一個彈性嘅環境等媽媽可以同時間兼顧小朋友同工作。其實好多外國嘅國家不能福利同待遇都好過香港，尤其係產假！好多地方已經推行一年產假，而香港仲係前四後六。而且好多外國公司已經容許僱員係屋企工作，等佢哋可以照顧小朋友！
「全職」
老實講，香港嘅托兒服務真係好差，唔可以話無但係做父母嘅都會唔放心，因為啲質素好參差。雖然香港好多人都會請外傭，但係真係太多虐待嬰兒事件，所以又係唔放心俾外傭去照顧。依家老婆做咗全職媽媽，而我亦都將某啲時間留係屋企工作，不但止希望可以睇到郭大少嘅長大，與此同時希望將投放最多嘅時間俾郭大少，等佢係一個更好嘅環境成長。至於生活質素嚟㗎嘢，好死嘅啫！講到尾都係小朋友緊要！
