「天氣」
講真好多地方都可以好凍，只不過今次香港受到一股寒流而導致連日嘅低溫。當然香港真係好少會低過零度，而今日雖然淨係出去買嘢返屋企煮嘢，但係已經覺得好似去咗一啲會落雪嘅地方咁。真係好耐無試過係啲咁凍嘅環境，雖然再凍啲都試過，只係霎時之間的天氣變得咁快真係有啲唔習慣。對於好多香港人嚟講，真係都幾難頂，所以搞到啲電器鋪嘅暖爐無晒貨。
「何必」
雖然今次香港好凍，而且導致好多地方結冰同落雨雪，但係我覺得係唔係應該要顧及自己同其他人嘅安全。個個好似大鄉里出省咁上山諗住去睇結霜同搏吓會唔會落雪。因為香港好少咁凍，而其實好多人都唔知會好危險！首先當路面結冰嘅時候，路面係好滑，無論揸車定係上面行都會好滑，容易引致意外。另外好多人低估咗出面嘅氣溫，根本無做足準備，所以容易引發低溫症。真係何必呢？
「責任」
有時真係唔知啲人想點，其實真係唔係啲乜嘢新奇嘅嘢，只不過係香港少見啫。但係個個好似真係從來未見過結冰咁，一窩蜂去大帽山，飛鵝山，等等嘅地方去睇「冰」。就係咁到最後仲要搞到封路唔比人同車上山！其實你問我嘅話，真係有咁嘅需要，事關真係好危險，而今日亦有好多人因為比賽而被困係山上面需要救援。講到尾個個都係湊熱鬧，但係就無諗過會有危險。
Also published on Medium.
