「天氣」
依家啲天氣真係返晒常，突然之間竟然變得超級凍，而之前外國氣象部門仲話香港聽日會落雪。只不過香港落雪嘅機會真係好少，不過香港以前都有試過。今日香港天文台竟然係晏晝發出霜凍警告，而返咗嚟香港咁多年今次真係好似第一次！你話係唔係癲咗呢，無啦啦寒流襲港，搞到個個揸揸淋去買暖爐，暖風機。因為仲要凍多可幾日！比我揀當然留係屋企最實際啦！
「寒冷」
今日真係凍到傻咗，之前成個冬天都唔凍，就連聖誕節都好暖，所以啲冬天衫同羽絨褸都未著過。不過嚟兩日真係好鬼凍，仲要一路落雨同吹大風。雖然淨係睇溫度嚟講唔係我住過最凍嘅地方，以前係大連都試過零下二十幾三十度，不過感覺仲無香港咁凍。當然乾凍同濕凍真係有好大分別，所以就算香港嘅溫度都未係零下嘅時候，感覺上已經差唔多！
「誇張」
今次嘅寒流唔單止淨係香港受到影響，其實整個中國甚至美國都俾唔同程度嘅寒流吹襲。講真我都係第一次聽到寒流要用「霸王級」嚟形容，而美國更加用「怪獸級」去形容今次嘅暴風雪。真係非常之誇張！由此證明今次嘅寒流有幾犀利！點解依家地球嘅天氣會咁奇怪，相信好多人會歸咎於全球暖化，而極端天氣相信會陸續有嚟。大家都話今年天氣唔凍，依家就凍俾你睇，重要係超凍嗰隻！
