「網絡」
香港其實有好好嘅網絡，因為大部份嘅地方都有光纖入到屋。價錢嚟講真係唔算貴，而係速度方面亦都唔輸蝕。但係香港揀寬頻供應商就同揀電訊商一樣咁麻煩。因為每間公司都提供唔同嘅服務，而有啲大廈屋苑就真係要睇下你想用個間。真係有啲大廈只可以得一間供應商俾你揀，就算知道佢哋服務差你都無辦法，焗住要用佢哋！有時租樓同買樓都真係要先問清楚！
「寬頻」
其實因為搬屋所以要將現有嘅寬頻服務搬遷到新屋嗰邊。雖然用咗網上行一段時間，但係今次真係比佢吹脹。我已經一早打電話去客戶服務中心同佢哋講我要做搬遷手續。而當時個客服已經同我講要收搬遷費，我亦唔介意。但係點知到預約當日，個師傅上嚟安裝嘅時候先至話唔得。咁我當然打去鬧爆佢哋啦！搞咗幾日新屋仲未有寬頻，真係人都癲！
「流失」
講真我唔相信我個屋苑得我一個用網上行，而點解佢哋裝唔到嘅原因係因為要砌開走廊上面嘅假天花，所以要收我額外嘅費用。咁點嘅佢哋唔早啲講？唔通佢哋真係得我一個用戶？如果佢哋一早講我都無咁嬲，真係離晒大譜！講真我唔係無俾月費，仲要用咗佢哋好多年！更何況我已經要俾搬遷費，就係咁，佢哋將會無咗一個長期客戶。其實如果有啲咁嘅情況，應該一早知道，唔駛等師傅上門先知囉！
