「熔斷」
對於有買開股票嘅朋友，一定對過去一星期兩次「熔斷機制」有唔同睇法。其實係而家嘅環球環境，投資股票真係要好小心。但係中國證監會竟然覺得「熔斷機制」係可以保障股票市場嘅穩定性，但係開市十五分鐘就已經搞到停市，問題係邊？當然就係投資者嘅心態。如果你知道隨時個股市會因為「熔斷機制」而停市嘅話，比著我都會係停市前出貨走人先啦。所以個機制根本無將人嘅心理考慮在內。
「干預」
其實「熔斷機制」原意唔係干預市場，而係希望設置冷靜期。依家嘅中國股票市場真係好似香港嘅九十年代，全民皆股。當然經濟好嘅時候當然就係越升越有，不過就算中國政府想利用「熔斷機制」穩定市場，但係其實只會加速跌勢，因為係大環境影響下再加上恐慌性出貨止蝕，機制出台幾日就已經觸動機制兩次真係唔難。所以中國證監會急急煞停「熔斷機制」，但係咁就可以停止跌勢，穩定股票市場？
「反應」
當然好多國家都有採用「熔斷機制」但係因為中國市場係當日買入嘅股票，必須要到下一個交易日先至可以賣出，同其他市場唔同，所以引發市場恐慌不足為奇。另外現時嘅「熔斷機制」閾值設置太低，不但不能防範極端情況，反而造成反效果。雖然話今次中國證監會急急煞停「熔斷機制」但係唔代表佢哋唔會作出適當調整之後再次出台。點都好，投資係有風險，所以真係要量力而為唔好跟風呀！
