「領袖」
有啲好嘅領袖通常都係生不逢時，就好似奧巴馬咁。佢係歷史上第一個黑人總統，而佢過去所推行嘅改革都係好有影響性，只不過好多時都遇到阻力。作為一個國家嘅領導者除咗要迎難而上之外，亦要持有開放嘅態度。但係好多時唔係個個國家都有咁嘅領袖出現，而好多時都係因為政治因素而影響好多好嘅政策。就好似佢一直想加強美國槍械管制咁，眼白白見到好多慘案但係作為一個總統竟然束手無策。
「總統」
如果你問我，奧巴馬其實係一個相當唔錯嘅美國總統。雖然唔知大家有冇留意之前佢竟然參與「人在野」嗰個節目，但係堂堂一個美國總統竟然陪個節目主持人一齊癲。雖然話係拍攝期間佢附近一定有好多保鏢，但係一個總統要放低佢嘅身段，而且參加短暫嘅野外求生，重要去到阿拉斯加冰川，試問邊個國家嘅總統會去參加啲咁嘅節目。佢哋上電視大部份嘅時間都係工作關係而唔係去拍攝一個電視節目。
「現實」
睇完個節目，其實可以理解到做一個總統其實唔係你諗咁易。好多時都受到好多限制，就正如奧巴馬係節目入面所講，因為安全理由佢連一部智能手機都無。有時想做一啲嘢都有可能俾身邊嘅保鑣阻止。不過其實佢好貼地，唔似得依家好多人咁離晒地，都唔知基層嘅問題。試問邊個總統會食一啲熊人食剩嘅三文魚，至少我哋特首唔會！雖然個節目係上年播出，但係睇完之後你會對奧巴馬有另一種睇法。
