「坤哥」
如果你唔認識吳業坤唔緊要，因為年年都有好多新人係螢幕上面出現，而坤哥其實係無綫早幾年前舉辦嘅超級巨聲二入面獲得第五名嘅參賽者。但係過去咁多年其實大家都有可能忘記咗叫歌手嘅身份，因為佢大部份嘅時間都係做主持同拍劇。最近亦因為佢有份主演嘅「愛。回家」所以基本上晚晚都有機會見到佢。但係今年最令我記得坤哥嘅其實係佢嗰兩隻歌「原來她不夠愛我」同「陽光點的歌」。
「堅持」
雖然坤哥今年先至係唱歌方面獲得認同，但係我相信好多人都會戥佢攞獎開心。我只可以講嘅就係，有志者事竟成，堅持自己夢想，最終修成正果。真係可以講句守得雲開見月明！不過大家唔好淨係睇表面，因為除咗係螢幕見到坤哥之外，其實佢一直都無放棄過唱歌。佢今年攞獎真係講得上實至名歸，因為佢嘅努力無白費。學佢話齋，大家記得佢叫「坤哥」就已經足夠！
「啟示」
平時你以為坤哥傻下傻下，戇戇居居，但係當你睇佢每次唱歌嘅時候，佢都會表露出熱愛音樂同尊重音樂個專業態度。當然除咗係傳統媒體之外，其實佢仲有係其他平台繼續佢嘅音樂路，只不過有幾多人關心佢？一定唔係班家庭主婦！而且除咗係大台之外，今年佢亦都入選叱咤嘅最受歡迎男歌星嘅五強。咁係因為大台嘅原因？其實坤哥真係坤得我哋透，因為佢一啲都唔傻，而且好醒目！
Also published on Medium.
