「發夢」
每個人都有夢想，都會有發夢嘅時候。當然好多人會發夢中六合彩，咁以後就可以打跛腳唔使做！不過係唔係連發夢都唔俾？其實有時人發下夢係一件好事，至少你會好似開心啲。只係現實歸現實，我哋嘅社會就係唔俾你發夢，事關你都要三餐一宿。正如我有個朋友講，到最後都係為咗搵食，只要可以生存咁咪做囉。講到尾都係為咗生活啫。諗多無謂，行動最實際！
「創業」
依家好多創業嘅人好多時都係發緊夢！點解？因為好多時佢哋都係活係自己嘅世界入面！因為以為自己天下無敵！因為覺得創業係好型！因為覺得創業好容易揾錢！因為覺得張卡片上面印咗行政總裁或者創辦人就高人一等！因為覺得做打工仔無前途！因為好多數之不盡嘅原因！但係佢哋連基本生活都未搞掂，淨係以為可以吹兩咀就會變成億萬富翁，咁你話佢哋係唔係發緊夢？
「夢想」
當然我都有夢想，不過就唔再係天馬行空。仲記得以前想有一個同設計有關嘅皇國，只要同設計有關都想做。不過好明顯就放棄咗啦。之後又諗住起個網上平台俾海外嘅香港人，其實有少少似依家嘅社交媒體，而好明顯又係諗囉。所以依家淨係想做好數據分析一樣嘢，希望可以多啲人學識數據嘅重要性，佢嘅好與壞。希望今次唔會再係一個夢，希望最起碼自己做唔到會有人接棒繼續做！
Also published on Medium.
