「駕駛」
作為一個駕駛者，揸車嘅時候都真係要一眼關七。唔夠瞓嘅時候，或者因病食藥都要留意自己嘅精神狀態，如果唔係真係好容易發生意外。而係香港，好多時比較嚴重車禍都係因為啲的士，小巴同貨車。當然我唔係歧視佢哋，但係搵食還搵食，你搵命博唔緊要，但係唔好害咗人哋。講真嗰啲車本身安全已經唔係好高，所以一有乜意外都會釀成嚴重傷亡。
「車禍」
係大時大節嘅前夕又發生嚴重嘅車禍，而今次又係因為貨車釀成事故。睇返個行車記錄儀嘅片段，雖然唔可以一口咬定係架貨車衝紅燈，但係一定關佢事。除此之外，好多人話架小巴無超速，但係睇片嘅時候真係唔覺得佢有減慢速度。而最無良就當然係個貨車司機，因為意外之後，所有人都去小巴到關心的傷者嘅情況，唯獨貨車司機只係關心架貨車嘅損毀情況。真係有無病呀？
「死傷」
今次嘅車禍暫時釀成四死十四傷，而死者當中有一個係手抱女嬰。當知道咗之後真係有啲唔舒服，因為自己個仔都好細，而每個父母一定最疼錫自己嘅仔女，但係因為今次嘅意外奪去個小朋友嘅生命，作為父母嘅一定會怪責自己。希望女嬰嘅爸爸同媽媽可以堅強咁面對。雖然講就容易，但係比著我都會怪自己無好好保護自己個小朋友。所以真係無時無刻都要注意安全！
