「加息」
講左咁耐終於加息了，雖然有好多人話今次加息係預咗，而我顧名思義唔係一個金融專家，只不過係對所以有興趣嘅人，與此同時亦都係一個錯過咗上次金融風暴而又無買到樓嘅人。講真無論你有無預咗加息都好，今次應該係另一個循環嘅開始，所以真係務必小心。我唔鍾意投資係因為風高浪急，隨時一鋪清袋。財不入急門，而我對炒賣一直無好感，比較喜歡腳踏實地。
「樓市」
對於好多人來講加息係覺得會影響樓市，但係會影響幾多？今時今日嘅香港係一個畸形嘅社會，加上大量嘅中國資金，講真個樓市會跌幾多真係無人知。如果你問我，我個人認為樓市會跌除咗外圍因素之外，其實係好睇一個地方嘅經濟。如果睇依家嘅香港，其實真係表面風光內裡坎坷。而樓市係除咗供求之外，重要係睇負擔能力。依家樓價係癲峯狀態，所以好多人都負擔唔起，再加上經濟持續下滑，樓價未必即刻大跌，只不過會有下行嘅現象。
「部署」
今日個股市反映一切，就係預咗會加息。所以不跌反升唔係意料之外。明年真係要謹慎投資，雖然以前係大公司嘅經驗係每當經濟下行嘅時候，生意會好，但係今日嘅環境仲好似十年前嗎？要衝定要守？其實都係要睇自己嘅承擔能力，心係想衝但係唔知點解覺得應該去守。點都好做好兩手準備，到時睇情況啦。自己講完都好似無講咁，同講「嚟球波一係入一係唔入」咁都係講廢話！哈哈！
