「遊戲」
好多時我哋玩家遊戲都係外國遊戲，而要講到有香港元素嘅其實十分之少。而大家又可能最熟悉嘅就應該要數返好幾多年前係社交網站一炮而紅嘅遊戲「古惑仔」。但係遊戲就係咁，一係好有話題性，一係好多朋友玩，一係就情意結，如果唔係真係唔會無啦啦走去買碟玩，甚至乎下載完過一兩日就刪除咗佢。今次朋友公司開發咗隻遊戲，當然要支持下，而係未出街之前有機會試玩。
「推薦」
其實我好少會推薦遊戲俾朋友，因為唔係個個都打機。不過今次破例宣傳一下朋友公司嘅新作品！就算你無聽過「光輝歲月」嚟隻遊戲，不過你一定聽過嚟隻歌！唔駛多講個遊戲嘅背景就當然係用我哋成長嘅香港啦，而遊戲入面嘅角色同物品都係大家嘅回憶。光輝歲月除咗係一個遊戲之外，其實仲好有深度，因為佢反映咗好多社會問題，當中又有幾多係你嘅心聲？咁你就要玩下啦！
「本土」
講真唔知如果新版權條例通過咗，隻遊戲仲出唔出到街，事關好多入面嘅內容都或多或少係二次創作。但係點都好，係遊戲入面好多嘅選角係大家熟悉嘅，而且故事亦都好本土化。雖然個介面我個人認為可以好啲，因為有時都幾難理解，需要習慣下，不過整體我玩嘅原因係個題材而唔係個玩法。當你見到「寶石戲院」，「鏢嫂」，「碌寶橙汁」，「精裝追女仔」，等等，你即刻覺得好親切。大家不妨下載玩下啦！
下載地址：
iOS：http://bit.ly/gch_ios
Android：http://bit.ly/gch_android
